「積穀防饑、養兒防老」？

前日看到一則新聞，花旗銀行委託港大社會科學研究中心，關於供養父母的意願。受訪者超過二千名，超過一半認為父母應自己顧自己，經濟獨立，搞掂退休，唔使仔女養。低於三成人願意犧牲生活質素供養父母。

很「悲哀」的新聞。傳統的中國「孝義」「倫理」等等都被現實社會催毁。想起之前看《終結貧窮》一書，提到貧窮在很多情況下是惡性循環。簡單一例，務農的如果可以儲到一筆錢買機器，就能提高生產力，從而提高收入，逐步脫貧。

想到香港的情況。假如，一個人，十八歲中五畢業出來做事，至今十二年，剛踏入三十歲。即使他多勤力工作，戶口仍然無積蓄。第一，本身收入不高。多年工作，後生時轉幾份工，到廿五六才穩定下來，但收入因學歷所限，即使有工作經驗，不無法得到較高人工。第二，父親幾年前，即將退休時被炒，連公積金都無，只賠幾個月人工了事。母親是家庭主婦，一向沒有收入。父親年輕時收入不錯，唔算有錢，但啱啱唔夠資格申請公屋，一直租私家樓住。父母無咩儲蓄，現在，一家三口的開支全靠一份萬零蚊的薪金。想打多份工都無時間，因為日頭份工已經越黎越晏收，日日踩十幾個鐘，得星期日可以抖抖。

屋企五百零呎兩房一廳（實用面積約是Y型公屋的細房，租金約千零二千蚊）屋租五千加埋差管雜費已經佔了收入的一半；一家三口每日三餐最小一個月都四千；仲要返工搭車，好彩唔使過海，計埋平時出下街，都要成千一個月；母親有長期病，去政府醫院睇醫生每個月買藥幾百蚊；仲要供保險，買最平都要幾百蚊，父親那份仲未供完，因為年紀越黎越大保費仲要越黎越貴，越供越多；隨時斷供。每個月掹掹緊啱啱好夠用月月清。

那位三十歲的青年人，係有供養父母，仲犧牲埋所有娛樂，朋友約唱k 食飯行街shopping?唔使旨意。仲算勉強夠錢用。結婚生仔？除非嫁／娶到個有錢人，如果唔係都好難。借問聲，三十歲，咁樣生活，邊個想？

供唔供養父母，已經係「能」與「為」的問題。即使他想邊做邊返學，進修提高學歷，首要問題是，何來錢交學費？政府持續進人修基金津貼最多兩萬蚊，讀半個學位都唔夠。一家三口要改善生活，睇黎都要等佢地申請到公屋，減少屋租的開支，才能解決；但又要望唔好加人工加得太多，三人家庭收入超過$13579就唔合資格。咁嘅情況，如果失業，咪無飯開？不如攞綜緩？父母未夠老，但母親有長期病，所以計算資產以兩個健全成人加一個健康欠佳為準，唔過$65000，就可以申請。每個月三個人計計埋埋大約五千幾蚊，仲有得住公屋申請津貼，去政府醫院唔使錢，同返工的收入比較雖小左一截，但可以用到嘅錢係差唔多。

由父母到仔女，月月清，連幾百蚊都好難儲，點改善生活？點投資？點樣安排退休生活？如果是已婚人士，自己搬開住，開支仲多。點夠膽生呢？就算生，好辛苦好慳先會養得掂。咁樣會唔會做成一個循環呢？

以上例子，改變些設定，同樣可以改善生活。情況一：年青人的父母買左間樓，已經供完，每個月租屋錢慳左，年青人就可以邊儲錢邊讀書，生活亦較輕鬆。情況二：年青人與父母一向住公屋，仲要父母參加左「租者置其屋計劃」用十幾萬買左間公屋。情況三：父母有儲錢，退休生活暫時無問題，可以頂得上幾年。年青人一樣可以邊儲錢邊讀書。情況四：年青人從小就做兼職，夾夾埋埋啱啱好比到學費，可以供自己去外國讀書，邊讀書又邊做，返到黎可以搵到份好工。情況五：年青人天資聰穎，攞獎學金升學。情況六：中六合彩。