地中海

呢排不太忙，六點收工走人。琴晚同F去利時買牛仔褲（結果我又買左條），周圍行，在想著吃什麼的時候，走到厚福街發現一間新餐廳（以前甘潮個位），見價錢ok唔使等位，試下啦！

Olive Garden
地中海菜（土耳其、伊斯坦堡、希臘）
尖沙咀厚福街

Set Dinner都好多選擇，十幾款；有飯、意粉、魚、牛、羊；我們點了一個雞肉釀茄子（之前去希臘，S的媽媽煮釀茄子好正！所以想食）同埋一個巴黎汁牛柳配薯茸；餐湯係忌廉雜菜湯，另各加$7，配一份沙律及一份前菜。

本身唔好稀身的忌廉湯，無特別。前菜幾好食；橄欖配土耳其醬，橄欖係無核裡面有條紅椒那種，土耳其醬都幾香（我地唔知係用黎搽面包定就咁食）。沙律的sauce都唔錯，甜甜地。主菜的釀茄子，原本是我點的，食左一啖，唔對路，好羶！要同F交換食！牛柳唔錯，不知道巴黎汁是什麼，可能有些香料同咖哩的一樣，有小小咖哩香味；但味道易入口，唔太濃，同牛柳幾夾（之前去過偉华間餐廳，有個巴黎汁，問個侍應是什麼，佢話唔知～照試，但同琴晚的巴黎汁好唔同）。

餐飲我們都喝咖啡，幾好。（原本想喝土耳其咖啡，但唔跟餐，要正價$32，覺得唔抵，無叫。）

賣單，無收加一，個釀茄子飯$39，牛柳$78，同埋$14的前菜沙律；賣單$131。抵！不過要注意，餐廳比較小，宜兩至四人飯局。